The Freeman, CDN daog sa overtime

CEBU, Philippines - Moabante sa semifinals dala ang twice-to-beat advantage ang Freeman-Cebu Daily News (CDN) Red Shamans human nila gipilde sa usa ka kulbahinam nga overtime ang CCTN-47, 70-66, kagahapon sa Newsmen Basketball Association of Cebu (NBAC) 2013 Season didto sa Chiang Kai Shek gymnasium sa Cebu Eastern College (CEC).

Usa ka pisikal nga duwa ang gipakita sa duha ka koponan diin ang CCTN ang milabaw og 10 puntos paingun sa second half, 33-23.

Human gilaslasan og singko puntos ang labaw sa CCTN, gisuwayan pag-ilog sa The Freeman-CDN ang labaw batok sa agresibo nga CCTN sa third period.

Sa nahibiling syete segundos sa duwa, naglabaw og dos puntos ang CCTN, 60-58, apan nakahimo og footbak jumper si Jonas Panerio nga maoy mihatud sa duwa ngadto sa overtime.

Pabiling sikit ang duwa sa extra period, apan ang Freeman-CDN maoy nakahimo og mga crucial nga defensive stops,samtang gipasud ni Ador Mayol ang iyang lay-up sa katapusang 12 segundos nga maoy mikandado sa daog sa Red Shamans,68-66.

Si Panerio maoy nangulo sa Red Shamans sa iyang 25 puntos, gisundan ni Calvin Cordova nga adunay 15 puntos, samtang sila si Rico Navarro ug Lemuel Maglinte miamot og 12 ug otso puntos matag usa.

Si Rodhel Quimod maoy leading scorer sa CCTN sa iyang 25 puntos, samtang si Rey Gealon mitira og 19 puntos.

Sa second game, ang Sunstar-Bombo Radyo moabante usab sa semis human nila gilubong ang ABS-CBN, 86-66.

PUNTOS MATAG USA:

Unang duwa:

The Freeman-CDN (70)- Panerio 25, Cordova 15, Navarro 12, Maglinte 8, Mayol 6, Melecio 4

CCTN (66) – Quimod 28, Gealon 19, Del Corro 10, Ligan 9, Fuentes 2

Ikaduhang duwa:

Sunstar-Bombo Radyo (86) –Bayking 24, Patino 20, Amaro 12, Secvuya 8, Cerojano 12, Lucaban 4, Defensor 3

ABS-CBN (66)- Escalante 43, Abanes 11,Bulotano 8, Navarro 2, Nierra 2 (BANAT PALARO)