CEBU, Philippines - Nakaipsot ang University of the Visayas (UV) Green Lancers batok sa University of San Jose Recoletos (USJ-R) Jaguars sa iskor, 63-59 kaniadtong Sabado sa gabii atol sa pagbukas sa 1st Mayor Teresito Mariñas Cup basketball tournament didto sa Barili, Cebu.
Sa primerong duwa, midaug ang AC Troopers batok sa Broken Arrow, 95-84.
Si Steve Cedrick Akomo maoy nangu sa Lancers sa iyang 17 puntos ug midugang si Francisco Arong og 12 puntos.
Ang Jaguars gipangulohan ni Matthew Parker kinsa mihipos og 10 puntos samtang mibahug og tulo ka three-pointers si Rendell Senining.
Sa laing bahin, silang Randy dela Pisa ug Eman Calo maoy nangu sa AC Troopers.
Ang tournament commissioner nga si Julie Flores nagkanayon nga nagduwa kagabii ang USC Warriors batok sa SIT Skyblazers apan wala dayon hisayri ang resulta sa maong duwa. (BANAT PALARO)