CEBU, Philippines - Mikulit og daog ang Talleco pinaagi sa paglubong sa Teleperformance Lions, 69-57 sa CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Gipangulohan ang kadaugan ni Carmelo Baja, kinsa miugkat og 21 puntos ug milangkat og 14 ka rebounds, samtang si Ariel Montesclaros miabuno og 18 puntos.
Si Mark Matidios mihipos og 11 puntos alang sa Talleco nga migamit og 21-13 rally sa ikaduhang kuwarter aron mausab ang dagan sa duwa.
Bugtong si Eugenio Paming lang ang miiskor og double figures alang sa Teleperformance pinaagi sa iyang 18 puntos, upat ka rebounds ug tulo ka steals.
Sa sayo pa, sila si Yrold Caracut ug Frederick Montelibano nagkumboya og 27 puntos aron pangulohan ang Syke Pioneers alang sa ilang 67-51 nga kadaugan batok sa Telstra-Teletech Titans. (BANAT PALARO)