MJD L abante sa semis, usc '86-Solar Link daog

CEBU, Philippines - Midaug ang top seed MJDL Titans ug ingon man ang underdog USC ‘86/Solarlink batok sa tagsa-tagsa nila ka kaatbang sa miaging adlaw pinaagi sa kulbahinam nga duwa atol sa pagsugod sa playoffs sa Cebu Customs Invitational Tournament 2013 didto sa USC North campus gym sa Gen. Maxilom avenue, ning dakbayan.

Sa primerong duwa, naka-ipsot ang MJDL batok sa Global Rollway, 79-76 aron sakmiton ang unang luna sa semifinals samtang nagkinahanglan pa og singko minutos nga overtime ang USC ‘86/Solarlink sa wala pa nila hingpit ipadaplin ang Bureau of Customs (BOC) aron mo-iksor og 96-91 nga kadaugan.

Ang Global Rollway kinsa maoy fourth seed sa Group B sa nahisgotang torneyo, mipakurat sa topssed MJDL tungod kay sila maoy nagkontrolar sa duwa sa sayong bahin hangtod na sa fourth period diin nanimaho ang dakung posibilidad sa usa ka upset ilabi na dihang sila maoy naglabaw sa halftime, 40-33.

Ila pa gyung nainat ang ilang labaw ngadto sa diyes puntos, 70-60 atol sa fourth quarter.

Hinoon, kalit nahigmata gikan sa ilang pagkahinanok ang MJDL ug kalit nga nanginit pinaagi sa sagunson 11 puntos gikan ni Nico Laborte aron tablahon ang duwa sa iskor, 76-all may 27 segundos ang nahibiling oras sa duwa.

Didto kalit lang nahugno ang Global Rollway ug wala na sila makapuntos gikan niadtong tungora ilabi na dihang mihimo'g full-court press ang MJDL ni coach Calib Gawangon.

Si Tata Laborte maoy nangulo sa MJDL sa iyang 21 puntos ug ang iyang manghud nga si Nico midugang ug 19 puntos.

Sa laing duwa, gipakuratan sa USC ‘86/Solarlink ang BOC aron magpabiling buhi sa ilang kampanya sa playoffs.

Ang BOC nga gipangulohan ni Mactan Collector  Bingo Matugas naghupot og twice-to-beat advantage isip no. 2 seed.

Ang trio nilang Arturo Mata, Bing Caravaña ug Almar Cavinte maoy nahimong yawe sa kadaugan aron makapugos sila'g rubber match batok sa BOC.

Ang USC ‘86/Solarlink kinahanglan modaug kaduha batok sa BOC aron muabante sa semifinals.

Naglabaw na unta ang USC '86/Solarlink sa iskor, 80-77 ug may 4.3 segundos na lang ang oras apan maka-iskor si Jeffrey Gaculos sa BOC ug three-pointer aron ihatud ang duwa ngadto sa overtime.

Didto sa overtime period, wala magpahulga ang USC ‘86/Solarlink ug wala sab sila mokolapso ug sila pa gani maoy kanunay naglabaw pinaagi sa scoring tandem nilang Mata ug Noli Romarate, 91-84 sa nahibiling 1:27 ang oras sa duwa.

Si Romarate mikadlit og 26 puntos samtang si Caravaña midugang og 20 puntos ug si Mata mibahug og 16 puntos, lima niini ang three-pointers.

Si Kenneth Kern Sesante maoy nangu sa BOC sa iyang 23 puntos ug silang Gaculos ug Matugas midugang og 16 ug 14 puntos, matag usa.

Magbagat pag-usab ang duha ka teams karong semanaha alang sa do-or-die game diin ang modaug tali kanila moabante sa semifinals.

Aduna pay laing sangka nga nahibilin sa quarterfinals sa Group B tali sa CIPU batok sa ALIN ug ang Philhealth makigtakos batok sa Bureau of Internal Revenue diin parehong armado'g twice-to-beat incentives ang CIPU ug Philhealth.