CEBU, Philippines - Himuon karon ang Game-4 sa NBA "best-of-seven" Finals tali sa San Antonio Spurs ug defending champion Miami Heat didto sa AT&T Center sa San Antonio, Texas.
Walay tarong katulog si Tony Parker ug ang San Antonio Spurs tungod sa kabalaka sa iyang nabitad nga tuong hamstring nga nakadaut sa iyang duwa sa Game-3 sa NBA Finals.
Si Parker nakaangkon og hamstring injury atol sa second half sa Game-3 diin gilubong sa Spurs ang Heat, 113-77 aron makabentaha sa series, 2-1. Sa maong duwa, si Parker igo lang miiskor og sayes puntos.
Ang nasinati nga injury ni Parker maoy nakapahilom sa saba unta kaayong selebrasyon didto sa San Antonio.
Samtang ang ubang role players sa Spurs maayo kaayong nakaduwa, ila gihapong gikinahanglan ang liderato ni Parker tungod sa iyang kahanas sa pick-and-roll. Silang Danny Green, Gary Neal ug Kawhi Leonard daku kaayo’g gikatabang sa maong series ug silang tulo nakatigum og 130 puntos sa miaging tulo ka duwa nga mao sab ang naiskor nilang LeBron James, Dwyane Wade ug Chris Bosh sa Heat.
Maayong pagkadala ni Neal ang iyang papel hulip kang Parker diin mibahog siya’g 24 puntos lakip ang unom ka triples. Ang Spurs nga tinguhang modaog sa ilang ikalimang titulo sa NBA, mao gihapon ang mo-host sa Game-5 unya sa Lunes.