CEBU, Philippines - Milansang sa ilang ikaduhang sunod-sunod nga daog ang 1&1 Marauders, ning higayona gikan sa Kyocera
Frontiers, 61-49 sa nagpadayong 9th CSCC-League Basketball Tournament niadtong Sabado didto sa City Sports
Club-Cebu gym sa Cebu Business Park.
Si Jan Isiah Gabest mitusak og 15 puntos uban ang lima ka steals, tulo ka rebounds ug tulo sab ka assists,
samtang si Arnel Azarcon miabuno og 12 puntos, upat ka rebounds ug upat sab ka assists alang sa 1&1 Marauders nga
maoy midiktar sa duwa human moposte og 15-16 sa first period.
Ang 1&1 Marauders nilabaw og otso puntos sa halftime, 27-18, apan ang Kyocera misukli og 21-14 nga
rally sa third quarter aron mosikit sa iskor, 40-41.
Apan mao ra kadto ang labing maayo nilang nahimo kay ang 1&1 Marauders mipasiugda'g makabungog nga
20-9 run aron sakmiton ang 12 puntos nga kadaugan.
Si Eliot Emeron maoy topscorer sa Kyocera nga miantog og 12 puntos uban ang walo ka rebounds, tulo ka
steals, tulo ka blocks ug duha ka assists, samtang si Ariel Ramonito Edera mitimbre og 11 puntos, unom ka rebounds,
unom ka assists ug tulo ka steals, apan ang ilang mga paningkamot nakawang lamang.
Sa laing bahin, ang defending champion Stream Ingenyounity ug Sykes Pioneers midaog pinaagi sa "default"
batok sa ASI ug Teleperformance.
PUNTOS MATAG USA
1&1 (61) - Gabest 15, Azarcon 12, Basañez 8, Fernandez 6, Jamola 4, Bastida 4, Rafailes 4, Cortes 3,
Santos 3, Mahilum 2
Kyocera (49) - Uy 12, Alegre 11, Edera 11, Panal 10, Sy 2, Navarro 2, Cabiles 1 (BANAT NEWS)