CEBU, Philippines - Unom ka teams ang kumpirmadong mosalmot sa 1st Mayor Teresito Mariñas Cup Invitational Basketball nga
sugdan sa Hunyo 29 didto sa Robert V. Alquizola Memorial Gymnasium sa Brgy. Poblacion sa Barili, Cebu.
Ang mga koponan gibahin ngadto sa duha ka brackets. Nasakop sa bracket A mao ang University of the
Visayas (UV), University of San Jose-Recoletos (USJ-R), Salazar Colleges of Science and Institute of Technology
(SCSIT), samtang sa bracket B mao ang DG Saloon, AC Troopers ug SG Mercantile.
Mopailawom sila og single round robin format diin ang top two matag bracket moabante ngadto sa crossover
semifinals. Ang mga modaog maoy magsangka sa knockout finals.
Ang champion makadawat og P50,000, ang second placer makaangkon og P30,000, samtang ang third
mobulsa og P20,000. Ang fourth placer makadawat og P10,000. Matag team segurado na makadawat og P5,000
consolation prize.
Gawas sa basketbol, si commissioner Julie Flores miingon nga ang lokal nga kagamhanan sa Barili ubos sa
liderato ni Mayor Teresito P. Mariñas mopasiugda sab og uban mga kalihukan sama sa boxing, chess, table tennis, soccer
ug lawn tennis isip kabahin sa ilang grassroots sports development program. (BANAT BALITA)