CEBU, Philippines - Gipakita sa University of San Carlos (USC) Warriors nga mahimo silang modominar batok sa University of
Cebu (UC) Webmasters human moiskor og daog, 80-72 atol sa exhibition game niadtong Huwebes sa gabii didto sa
Tuburan, Cebu.
Ang USC mipukan sab sa UC sa ilang duwa alang sa ikatulong dapit sa Enervon CESAFI Partner's Cup sa
miaging semana didto sa Cebu Coliseum.
Ang umaabot nga CESAFI rookie nga si Miguel Plata, ang recruit sa USC gikan sa University of Mindanao sa
Davao City, maoy miabaga sa opensa dihang miposa siya og pito ka sunod-sunod nga puntos aron hatagan ang Warriors
sa ilang labing dakung labaw, 72-63 sa uwahing bahin sa fourth period.
Hinuon, ang Webmasters mitubag sa ilang 7-2 run sa katapusang dos minutos sa duwa, apan si Nico Magat ug
Cameroonian Ahmed Salihou mitapos sa duwa pinaagi sa 6-0 nga rally aron ihatod ang USC ni coach Julian Macoy
ngadto sa kadaugan.
Si Plata mihipos og 12 puntos, apan si Ian Ortega ug Magat maoy topscorers sa USC nga adunay 14 puntos
matag usa.
Sila si Jan Michael Auditor ug Saed Quintao mao sab ang nangulo sa UC nga parehong miiskor og 22
puntos. (BANAT NEWS)
PUNTOS MATAG USA
USC (80) - Ortega 14, Magat 14, Plata 12, Salihou 9, Rabat 8, Guardatio 6, Qie 6, Ollodo 5, Duran 4,
Adlawan 3, Seno 2
UC (72) - Auditor 22, Quintao 22, Cabrera 18, Ampoon 6, Misa 4