CEBU, Philippines - Sugdan na ang second conference sa Cebu
Elite Basketball League Friendship Cup 2013 karong hapon didto sa University of San Carlos
(USC)-North Campus gymnasium sa General Maxilom Avenue, ning siyudad.
Ang gikahinaman nga duwa tali sa La Salle ug Ateneo high school teams ang molamas sa upat ka adlaw nga
torneyo, apan dili pa kini mahitabo kay ang duha moduwa pa sa managsamang karibal.
Ang De La Salle Santiago Zobel School Junior Archers ni coach Boris Aldeguer makigsangka sa Cebu
Institute of Technology-University (CIT-U) Wildkittens ni coach Bembem Alcaraz sa alas-4 sa hapon alang sa pasiunang
duwa, samtang ang defending champion Sacred Heart School-Ateneo de Cebu (SHS-AdC) Magis Eagles mosugod sa
ilang title defense batok sa CIT-U sa alas-7 sa gabii.
Sa ikaduhang duwa sa alas-5:30 sa hapon, ang USC Baby Warriors ni coach Carlo Britt Reroma makiglayog
sa University of San Jose-Recoletos (USJ-R) Baby Jaguars. Ang University of the Visayas (UV) Baby Lancers ni coach
Delfin Pepito Jr. walay duwa karon ug mopakita sila'g aksiyon ugma pang adlawa.
Alang sa Alabang-based Junior Archers, ang ilang pagsalmot sa maong torneyo makatabang sa pagbaid sa
ilang abilidad alang sa umaabot nga season sa UAAP.
Ang unom ka partisipanting koponan moduwa og single round robin format, diin ang top two teams matag
bracket moabante sa crossover semifinals. Ang modaog maoy mag-abot sa knockout finals sa Hunyo 12. (BANAT NEWS)