CEBU, Philippines - Sa ilang pagharus sa SBP ug sa Passerelle divisions sa CYBL VISMIN Goodwill Games, daghan ang nakapangutana kung mao na ba kini ang panahon sa paghari sa University of San Carlos (USC) sa grassroots age group basketball?
Mitumaw kini human ma-sweep sa USC ang SBP ug Passerelle division titles sa miaging adlaw didto sa SHS-Ateneo de Cebu Gym sa Canduman, Mandaue City.
Unang midaog sa titulo mao ang USC SBP team kinsa mipukan sa St. John’s Institute (SJI) of Bacolod, 49-42. Nasundan sab dayon kini sa titulo sa Passerelle division human modaug ang USC batok sa Ateneo de Iloilo, 51-36.
Sikit ang duwa sa finals sa SBP division ug maoy naka-una ang SJI sa first period, 10-9 unya milabaw sab ang USC, 23-22 sa halftime.
Nakaginhawa og gamay ang USC didto sa third quarter dihang milabaw sila'g sayis puntos, 36-30 pinaagi sa siete puntos ni Zhar Antontio Octaviano.
Nakapasulod og three-pointer si Daniel Coo sa SJI aron mosikit, 30-29 apan ang USC maoy nagkontrolar sa duwa sa third quarter bisan pa sa hulga sa rally sa SJI ug ilang gitapos ang maong quarter pinaagi sa ilang 6-1 scoring run.
Mibawos og 5-0 run ang SJI sa fourth period aron mosikit sa kataposang higayon, 36-35. Human sa banos-banos og sukli'g kuatro puntos, ang kataposan sa iskor, 40-39 sa nahibiling tres minutos sa duwa.
Miposa og usa ka three-pointer si Rasheed Libradilla aron sugdan ang fourth period ug 7-0 run ug milabaw ang USC og siete puntos, 47-39 sa nahibiling dos minutos sa duwa.
Si Miguel Sarmiento sa SJI mihimo sab og triple aron mosikit 42-47 sa kataposang 1:47 sa duwa apan wala na makasikit pag-usab ang SJI. Wala na makasikit pag-usab ang mga bisitang taga Bacolod human sa basket ni Libradilla.
Silang Octaviano ug Libradilla maoy nangu sa USC sa ilang nuybe puntos matag usa samtang si Kurt Co maoy nangu sa SJI sa iyang otso puntos.
Sa SBP division, kanunay naglabaw ang USC ug gikan sa ilang sikit nga 10-9 human sa first quarter, nakamaneho sila'g labaw atol sa halftime, 24-17.
Didto na mobirada og maayo ang USC sa third period pinaagi sa trio nilang Jholo Pakanna, Jean Jacque Antigua ug Neville Morales ug maayo sab kaayo silang nakadepensa ug wala makahuygo ang ilang karibal gikan sa Iloilo.
Si Scott Aying maoy nangu sa opensa sa USC Scott Aying sa iyang 11 puntos.
Naghimo'g double celebration ang USC tungod sa maong kalamposan. (BANAT PALARO)