CEBU, Philippines - Wala'y laing tirada ang Mac Nels Forwarders ug ang Alin Customs Brokers ni team owner Israel Alin kung dili ang paghipos og laing kadaugan dihang makigsangka sila batok sa tagsa-tagsa nila ka karibal sa nagpadayong 2nd Cebu International Port Users (CIPU) basketball tournament nga motapon didto sa CEC gym sa dan Dimasalang ning dakbayan.
Ang 4-1 nga Mac Nels nga gipangulohan sa ilang shooting guard nga si Loreto Castillo, maoy puntariya nga taposon ang elimination round sa ikaduhang pwesto diin ilang ikasangka ang unpredictable nga Ynah Brokers ni team owners Edwin Carmen ug Lourdes Baybayon nga gilangkuban sab og mga batan-ong players.
Ang Ynah Brokers kinsa adunay 3-3 nga baraha miabante na sa quarterfinals apan maoy ilang tuyo nga inaton ang ilang winning record ug ilang gilauman nga ang presensiya ni Jury Garcia nga usa ka shipping lines manager nga tua magbase sa Davao, makatampo og dako sa ilang kampanya.
Sa ikaduhang duwa karong hapona, tinguha sab sa 3-3 nga Alin Brokers nga taposon ang elimination round ug laing kadaugan dihang ilang ikasangka ang defending champion Canillas Customs Brokers (Yoryoj) ni Roy Canillas kinsa adunay 2-4 nga baraha. Hinoon, bisan og unsa'y mahimong resulta sa duwa, abante na sab daan sa quarterfinals ang Canillas.
Duha lang sa walo ka teams ang natagak nga mao ang Avenido Brokers ug Gonzales Brokers. Ang Petracorta Brokers maoy no. 1 sa ilang 7-0 win-loss record.
Taposon ang elimination round sunod semana diin magsangka ang 4-2 nga FYA ug ang Mac Nels. (BANAT NEWS)