CEBU, Philippines - Nahingpit na ang dugay nang giduso nga ‘super-fight’ tali nila ni undefeated ug No.1 pound-for-pound king Floyd Mayweather ug light middleweight king Saul Alvarez nga mahitabo sa Septiyembre 14 didto sa MGM Grand Garden Arena sa Las Vegas.
Human mihanap ang posibilidad nga mahitabo ang blockbuster showdown tali nila ni Mayweather ug Manny Pacquiao, pipila ka mga fans ug boxing analyst ang miawhag ni Mayweather nga sangkaon na lang ang Mehikano nga si Alvarez.
Nahimong isyu ang timbang sa katumanan sa away sa duha, apan nahilot ra kini human mibutang og catch-weight nga 152 lbs. alang sa duha ka boksidor.
Kagahapon, si Mayweather personal nga misangyaw nga opisyal nang nahikyad ang detalye sa sangka nila ni Alvarez. “I choose my opponent for September 14 and its Alvarez. I'm giving the fans what they want. It will be at the MGM Grand,†matud pa niya sa iyang twitter account.
Si Mayweather kinsa bag-o lang midaog niadtong Mayo 4 batok ni Robert Guerrero pinaagi sa unanimous decision adunay perpektong record nga 44-0, 26KOs, samtang si Alvarez undefeated usab sud sa 42 ka away, 32 niini gikan sa knockout. (LPM gikan sa boxingscene)