CEBU, Philippines - Tukion karong alas 10 sa buntag atol sa usa ka press conference kalabot sa partisipasyon sa University of the Visayas (UV) Green Lancers sa umaabot nga 2013 Kazan (Russia) Universiade unya sa Hulyo 6 hangtod sa Hulyo 17.
Si Henry Liao kinsa maoy executive director sa Federation of School Sports of the Philippines (FESSAP), maoy motambong sa maong press conference.
Ang Lancers maoy nakaangkon sa luna sa Philippine basketball delegation ngadto sa FESSAP human sila mahimong kampyon didto sa Bukidnon sa miaging tuig sa National Inter-Collegiate basketball championships.
Ang Lancers didto mahisakop sa Pool B sa 24 ka teams nga mosalmot diin ilang kauban sa grupo ang mga nasud sa Serbia, Romania, Mexico, Japan ug Mongolia.
Sila na maoy ikatulong Cebu-based team nga gipaluyohan sa FESSAP aron makaduwa ngadto sa laing nasud. Ang una mao ang Southwestern University ug ang sunod mao ang University of Cebu (UC) Webmasters.
Usa ka CESAFI Selection ang nakaduwa sab didto sa Hongkong diin sila maoy nahimong second placer.