Taulava gusto sa Ginebra

Dakung tinguha ni kanhi PBA center Asi Taulava nga makabalik og duwa sa liga uban sa Barangay Ginebra San Miguel.

Si Taulava kinsa mibiya sa liga niadtong miaging tuig katapusang miduwa sa Meralco Bolts sa wala pa siya mibalhin ngadto sa ASEAN Basketball League (ABL).

Marquez vs. Bradley gisibug

Gisibug ang petsa sa giatangang WBO welterweight title showdown tali nila ni Mexican boxing superstar Juan Manuel Marquez batok sa undefeated American Tim Bradley.

Sila si Marquez ug Bradley magsangka sa Oktobre 12 inay sa orihinal nga petsa sa away nga Septiyembre 14 didto sa Las Vegas.

Malone mutabang sa Jazz

Gidawat ni Hall-of-Famer Karl Malone ang posisyon isip usa sa mga development coach sa kanhi niya koponan nga Utah Jazz.

Si Malone may tahas nga mutabang sa mga batan-ong bigmen sa Jazz sama nila ni Derrick Favors ug Enes Kanter nga mapalambo pa ilang abilidad.

Slaughter di kauban sa Gilas

Makuhaan na usab og laing player ang Smart Gilas alang sa himuon niining training camp didto sa nasud sa Lithuania sunod buwan.

Kini human ang Cebuano center nga si Greg Slaughter posibli nga magpabilin sa nasud aron usab mutabang sa iyang koponan nga NLEX Road Warriors sa semifinals sa PBA D-League.