CEBU, Philippines - Miangkon ang forward sa Miami Heat nga si Chris Bosh nga nakabentaha karon ang Indiana Pacers sa Game 3 sa ilang Eastern Conference Finals nga adto ipahigayon sa Banker's Life Fieldhouse sa Indianapolis, Indiana.
''Our backs are against the wall,'' matod pa ni Bosh.
Sa gipamulong ni Bosh, husto siya nga adunay advantage ang Indiana.
Sa unang duha ka duwa sa Eastern Conference finals didto sa Miami, nakita nga ang Indiana maoy nagkontrolar sa duwa diin ilang napugngan ang Miami ngadto lang sa singko puntos isip pinakadako nilang labaw.
Ang duwa tua karon sa Indiana ug naghupot og 1-1 nga tabla ang Pacers ug Heat. Tinguha karon sa Pacers nga mokulit og dakong upset.
''It's even. It's 1-1. They have the possibility of a split as well and taking homecourt advantage back. So it's even. We don't feel like they've got the upper hand on us. We don't feel like we've got the upper hand on them,'' matod pa ni Pacers forward Paul George.
Ang kadaugan sa Pacers sa Game 2 mao lang ang ika-upat nga pagkalukapa sa Heat sulod sa 50 ka duwa ug ilang nabawi ang homecourt advantage.
Sa miaging tuig, nagtabla sab human sa unang duha ka duwa ang Pacers ug Heat ug gidala ang duwa balik ngadto sa Indianapolis apan wala nila matuman ang ilang damgo tungod kay napilde sila sa maong series, 2-4. (BANAT SPORTS)