CEBU, Philippines - Singko puntos dayon ang gihimo ni Tim Duncan atol sa overtime aron tabangan ang San Antonio Spurs nga mokulit og 104-93 nga kadaugan bisan pa sa ilang 18 puntos nga biya ug nagkinahanglan na lang sila'g usa ka duwa aron mobalik ngadto sa NBA Finals.
Aduna na karo'y 3-0 nga record ang Spurs sa Western Conference finals ug mao kadtoy ilang ikalimang daog sa postseason.
Samtang lab-as pa sa ilang panumdoman ang ilang pag-usik sa 2-0 nga abante sa West finals batok sa Oklahoma City sa miaging tuig dihang napilde sila sa mosunod upat ka duwa, nakabawi ang Spurs gikan sa ngil-ad nga pagsugod sa duwa diin nakabiya dayon og dako ang mas batan-ong Grizzlies kinsa delikado nang matagak sa West finals.
Wala makalabaw ang Spurs hangtod sa unang minuto sa fourth quarter. Posilbe nang ilang tiwason ang series ugma aron mobalik sa NBA finals sa labing unang higayon human sila mahimong kampyon niadtong 2007.
Nakapasulod sa ilang walo sa 10 ka tirada ang Spurs sa overtime diin siete puntos gikan kang Duncan kinsa mihimo'g 24 puntos samtang si Tony Parker maoy nangu sa Spurs sa iyang 26 puntos ug si Tiago Splitter midugang og 11 puntos.
Si Mike Conley maoy nangu sa Memphis sa iyang 20 puntos samtang midugang silang Marc Gasol ug Zach Randolph og 16 ug 14 puntos, matag usa. Mihimo'g 14 ka rebounds si Gasol ug si Randolph may 15 ka rebounds.
Miabuno sab og 15 puntos si Quincy Pondexter alang sa Grizzlies kinsa maoy mipalagpot sa West no. 1 seed Oklahoma City sa semifinals.
Kataposang naglabaw ang Grizzlies sa 85-84 may 1:04 ang nahibiling oras sa regulation pinaagi sa 15-footer jumpshot ni Gasol. Gikan niadto, igo na lang silang nakatabla sa duha ka higayon apan wala na makalabaw.
Si Randolph maoy nakahimo sa kataposang tabla sa sayong bahin sa overtime ug gidominar dayon sa Spurs ang kinatibuk-ang bahin sa overtime. (BANAT SPORTS)