CEBU, Philippines - Gipakita ni ALA Boxing Gym prospect Jason ‘El Niño’ Pagara (31-2, 19KOs) nga andam na siya alang sa mas dagkung hagit sa iyang karera human niya gipukan pinaagi sa unanimous decision ang Mehikano nga si Aaron ‘La Joya’ Herrera (25-2, 17KOs).
Ang 22-anyos nga si Pagara milampos pagdepensa sa iyang WBO International light welterweight title atol sa main event of "Pinoy Pride XX:Laban Kung Laban" fightcard niadtong Sabado sa gabii didto sa Pacific grand ballroom sa Waterfront-Cebu City Hotel and Casino.
Bitbit ang tinguha nga ipakita nga usa siya sa mga umaabot nga boxing star sa Pilipinas, agresibo nga miatake si Pagara diin iyang gipauwanan og mga hait nga kombinasyon sa ulo si Herrera.
Usa ka bangis nga left hook nga gisundan og usa ka right uppercut ang gipasud ni Pagara ngadto sa ulo ni Herrera sa second round nga mipayaka sa Mexican boxer.
Hinuon, mipakita usab og kaisug ug kalig-on ang Mehikano human siya daling nakarekober og nakahimo kini pagpasud og iyang mga kombinasyon ngadto ni Pagara sa nahibiling rounds sa away.
Wala hinuon mawagtangi sa iyang konsentrasyon si Pagara ug mibawos usab siya og kaugalingon niyang mga atake hangtud sa katapusang bagting sa kampanilya.
Human sa 12 rounds, tulo ka mga hurado ang miiskor og 115-112, 116-111 ug 119-108 tanan pabor ni Pagara.
“Lig-on kaayo kontraha oy, wa ko gadahum makabangun pa siya ato nga knockdown sa second round, pero pabilin raman ako atake wa sad ko nikompiyansa kay kusug sad,†matud pa sa garbo sa Cagayan De Oro City.
Sa iyang bahin, si ALA Promotions CEO Michael Aldeguer mibilib sa gibuhat ni Pagara ug mituo siya nga andam na kini nga musaka sa mas taas nga kompetisyon sa iyang boxing career.
"We now know that he can go to the next level. Jason showed in this fight what he can become," matud pa ni Aldeguer. "Herrera is not an easy opponent but our risk paid off as Pagara stepped up to the challenge."
Gibutyag ni Aldeguer nga plano nilang ipadala si Pagara sa Estados Unidos alang sa usa ka training camp aron mas mabaid pa ang abilidad niini.
Sa supporting main event, gipaundang sa third round ni rising ALA star Genesis 'Azukal' Servania (20-0, 8KOs) ang Indonesian nga si Isack Junior (20-8, 4KOs) aron panalipdan ang iyang WBO Asia-Pacific super bantamweight belt.
Naluwas usab si Jimrex 'The Executioner' Jaca (38-6, 21KOs) gikan sa pagka-knockdown sa 12 round aron pildehon pinaagi sa unanimous decision ang Mehikano nga si Jose Emilio 'Gigante' Perea (22-3, 14KOs) aron masakmit ang WBO Oriental light welterweight title. (BANAT SPORTS)