CEBU, Philippines - Gihataga'g leksiyon sa UV Baby Lancers ang tinun-an sa UV Basketball Clinic pinaagi sa pag-iskor og daog, 55-47 sa ilang exhibition game dili pa dugay didto sa Barangay Basak gym sa Lapu-Lapu City.
Ang UV Basketball Clinic nga gilangkuban sa mga piniling magduduwa nga misalmot sa summer cage clinic sa UV, mipakita sa ilang katakus bisan pa sa ilang kalinghod hinungdan nga wala kaayo makalubong og daku ang UV Baby Lancers.
Gipangulohan ni Felix Belano III, anak ni UV Lancers coach Donbel Belano ang kadaugan nga milansang og 19 puntos, gisundan nilang Joshua Flores ug Orlan Wamar nga miambit og 10 puntos matag usa.
Bugtong si JR Perales lang ang nakakuha og double figures alang sa UV Basketball Clinic pinaagi sa iyang 10 puntos.
Ang exhibition match gipaluyohan ni Brgy. Capt. Belong Darnayla, Lapu-Lapu City councilor Harry Don Radaza, UV Lancers, Donbel Belano, ROANRI Construction ni Roy Perales ug JB Sportswear ni Billy Nadado.
PUNTOS MATAG USA
UV BABY LANCERS (55) - Belano 19, Flores 10, Wamar 10, Oche 8, Catague 4, Manzo 4
UV BASKETBALL CLINIC (47) - Perales 10, Vicar 8, Inot 6, Dado 7, Ochea 4, Agbay 4, Nadado 4,
Dela Peña 2, Muñez 2