CEBU, Philippines - Bugtong tinguha karon sa Petracorta Brokers mao ang paghimo og 7-0 sweep sa elimination round dihang ilang ikasangka ang defending champion Canillas Customs Brokers (Yoryoj) sa 2nd season sa Cebu International Port Users (CIPU) basketball tournament didto sa barangay Cogon Ramos gym, ning dakbayan.
Ang Canillas palig-onan ni Kenneth Kern Sesante, apan dili makaduwa si John Yap kay moserbisyo kini sa iyang one-game suspension tungod sa nahitabong away batok kang Rogelio Davila sa Avenido Brokers nga dili sab makaduwa.
Sa ilang 2-3 nga baraha, ang Canillas ni Roy Canillas malaumon gihapon nga moabante sa quarterfinals tungod kay duna pa sila’y nahabiling usa ka duwa.
Sayo karong hapon, ang Ynah Brokers ni Edwin Carmen makigtigi batok sa Avenido Customs Brokers, samtang ang Alin Brokers makigsangka sa walay daug-daog nga Gonzales Brokers.