CEBU, Philippines - Nakalingkawas ang Cebu International Port Users (CIPU) Warships batok sa Global Rollway, 91-90 nga maoy labing kulbahinam ug sikit nga duwa sa Cebu Customs Invitational Tournament 2013 didto sa Benedicto College gym sa A.S. Fortuna St., Mandaue City.
Nabiyaan og nuybe puntos, 60-69 pagsugod sa fourth quarter, ang Warships hinay-hinay nga miapas sa tandem nilang Ramil Aniñon ug Francis Palero aron mailog ang labaw.
Si Palero maoy naghatag sa CIPU og 77-76 nga abante, apan ang Global mitubag aron ilogon ang 82-79 nga labaw sa nahabiling dos minutos sa duwa. Ang duha ka koponan nagpuli-puli'g ilog sa labaw sa maka-14 ka higayon sa final period.
Human nailog pagbalik sa CIPU ang labaw, ang Global misukli pinaagi sa triple ni Glenn Urbina alang sa 85- 84 nga bentaha sa katapusang 1:07 sa duwa. Si Palero mibawos sab sa kaugalingon niyang tres aron hatagan ang CIPU og 90-89 nga bentaha sa nahabiling 27 segundos.
Gitabla sa Global ang duwa, 90-all human sa split charities ni Alain Tarona sa katapusang 12 segundos. Ang free throw ni Aniñon sa nahabiling siyete segundos maoy naghingpit sa kadaugan sa CIPU.
Si Palero maoy nangu sa CIPU sa iyang 17 puntos, samtang si Primitivo Mondin midugang og 16 puntos.
Sa laing duwa, ang Bureau of Internal Revenue (BIR) nagsalig sa pagbalik ni Engel Sievert aron mabuntog ang Bureau of Customs (BOC) sa iskor nga 84-75.
Gibuak sa BIR ang sikit nga duwa sa fourth quarter, 64-63 ug miinat kini ngadto sa 76-68. Nakan-an sa Portmen ang labaw sa singko puntos, 75-80 sa baskets ni Kern Sesante, apan pakyas sila pag-ilog sa labaw.
Sa laing duwa, ang MJDL Brokers milansang sa ilang ikalimang sunod-sunod nga daog dihang ilang gimasaker ang CCBI, 124-53.