CEBU, Philippines - Milampos si ALA Boxing Gym fighter Jerson ‘Smooth Operator’ Mancio pagdepensa sa iyang Philippine light flyweight title pinaagi sa usa ka impresibong fifth round TKO batok ni Robel Villegas sa Elorde Stable niadtong miaging gabii didto sa Flash Grand Ballroom sa Elorde Sports Complex, Paranaque City.
Gipakita sa 25-anyos nga si Mancio nga mas dominante siya sa kusug human niya gipahagsa ang iyang kontra sa third round sa wala pa niya hingpit nga gitapos si Villegas sa fifth round pinaagi sa pagpauwan og bangis nga kombinasyon.
Sa maong kadaugan, si Mancio mipalambo sa iyang record ngadto sa 17-3, 8KOs, samtang si Villegas nakahiagum sa ikapitong career-loss sa iyang 16 professional fights.
Kini usab ang four-fight winning streak ni Mancio kinsa tinguha nga makakuha og laing kahigayunan nga moaway alang sa OPBF title. Si Mancio miaway na niadtong tuig 2010 alang sa OPBF light flyweight belt, apan napilde siya ni Japanese Ryo Miyazaki didto sa Osaka, Japan. (BANAT PALARO)