Global FC kinahanglan modaog sa Dordoi FC

CEBU, Philippines -  Krusyal nga duwa ang sagubangon sa Global FC sa ilang pakigharong sa two-time champion Dordoi Bishkek FC sa Kyrgyzstan sa  final Group B match sa AFC President’s Cup karong adlawa didto sa Cebu City Sports Center (CCSC).

 Ang Global FC ug Dordoi FC magsangka sa alas-7:30 sa gabii, human sa duwa tali sa Yeedzin FC ug KRL FC sa alas-4:30 sa hapon.

 Human sa ilang 5-0 nga kadaugan sa opener batok sa Yeedzin FC sa Bhutan,  ang  Global FC nga mirepresentar sa Pilipinas nahiagom og 0-2 nga kapildihan batok sa Pakistan KRL FC niadtong Biyernes .

 Sa maong kapildihan, ang Globa FC kinahanglan karon  nga modaog sa Dordoi FC aron magpabilin ang ilang kahigayonan nga masulod sa top two place.

     "We cannot afford to lose the game on Sunday (today) because we have a commitment,"  matud pa ni Global FC head coach Brian Reid sa The Freeman, ang igsuong pamantalaan sa Banat News.

 Gawas sa pagpilde sa Dordoi, mag-ampo usab ang Global FC nga mapilde ang Pakistan ngadto sa  Yeedzin  aron maseguro ang ilang pag-abante sa final stage sa AFC Champions League. (BANAT NEWS)