CEBU, Philippines - Nakabawon gyud og daog ang Raphael's Café/USJ-R Jaguars sa katapusan nilang duwa dihang ilang gipilde ang Cebu Landmasters/USC Warriors, 78-73 sa nagpadayong aksiyon sa Enervon CESAFI Partner's Cup 2013 basketball tournament kagahapon didto sa Cebu Coliseum.
Daghang mga batan-ong sinaligan mipakita sa ilang dakung mga paningkamot aron tabangan ang Raphael's Café paglansang og daog human sa double round sa eliminasyon nga naglakip ni Dan Cinco, kansang pito ka sunod-sunod nga puntos sa third period maoy miduslit sa rally dihang misikit kini, 45-46 sa nahabiling 3:41 sa maong kuwarter human sila mabiyai og double-figure halos sa tibuok first half.
Apan, ang back-to-back triples ni James Regalado sa final period nakapalagsik sa Raphael's Café, nasundan kini ni Kyle Lajato nga miiskor og insurance basket alang sa ilang 78-73 nga bentaha sa katapusang 12:4 sa duwa.
Si Regalado maoy topscorer sa Raphael's Café uban sa iyang 18 puntos, samtang si Lajato mihirit og 14 puntos.
Ang Cebu Landmasters, kinsa miposte'g 34-23 nga bentaha sa second period gipangulohan ni Francis Dave Guardiario, kinsa miugkat og 12 puntos, gisundan nilang Charles Pepito ug Ian Ortega nga pulos miligwat og 11 puntos, samtang si Stephen Que miabuno og 10 puntos.
PUNTOS MATAG USA
Raphael’s Cafe/USJ-R (78) - Regalado 18, Lajato 14, Bayhonan 10, Cinco 9, Sanchez 6, Zosa 5, C. Senining 4, Diaz 4, R. Senining 2, Silay 2, M. Parker 2, Rosell 1
Cebu Landmasters/USC (73) - Guardiario 12, Ortega 11, Pepito 11, Que 10, Salihou 8, Duran 5, Magat 4, Romaguera 4, Rabat 3, Ypil 3, Bensig 2 (BANAT NEWS)