CEBU, Philippines - Easternians miiskor og laing duha ka daog aron maoy mag-una sa ilang tagsa-tagsa ka dibisyon sa Coca-Cola PBA Youngstars Basketball Tournament 2013Cebu Leg niadtong weekend didto sa Sacred Heart School gym sa Gen. Maxilom Ave., Cebu City.
Ang Lancers nimasaker sa ACES, 63-20 ug sa Team Jaguars,66-41 aron morehistro sa ilang ikatulong sunod-sunod nga daog.
Sa laing bahin, nakahimo sab og sunod-sunod nga daog ang Team Easternians batok sa Team Golden Dragons, 87-35 ug dayon sa Perfect Sports Outfit/One on One, 67-48 alang sa ilang 3-0 nga baraha.
Ang Team Eagles ug ang Team Warriors maoy nahimuntang sa ikaduhang puwesto sa managsamang 2-0 win-loss records.
Ang Team Eagles milubong sa Team Jaguars, 61-36, samtang ang Team Warriors mipukan sa Team Panthers, 66-54 ug sa Golden Dragons, 99-47.
Nabuhi ang paglaum sa Team Greywolves nga mo-abante sa semifinals dihang ilang gidemolis ang ACES, 60- 31. (BANAT PALARO)