Pagara mobida sa Pinoy Pride XX

CEBU, Philippines - Pambato sa ALA Boxing Gym nga si Jason 'El Niño' Pagara (30-2, 19KOs) mohimo sa ikaduha niyang pagdepensa sa iyang WBO International light welterweight belt batok ni Mexican Aaron 'La Joya' Herrera (25-1, 17KOs) sa main event sa "Pinoy Pride XX: Laban Kung Laban" boxing card sa Mayo 25 didto sa Pacific Grand Ballroom sa Waterfront Cebu City Hotel and Casino.

 Mao unya kini ang ikaduhang higayon ni Pagara nga moaway sa  main event sa Pinoy Pride event. Una nahitabo niadtong Disyembre 18 sa miaging tuig diha gihapon sa Waterfront diin miiskor siya og sixth round stoppage batok sa iyang kanhi Mexican tormentor Rosbel Montoya sa ilang "rematch" aron sakmiton ang nabakante nga WBO International 140-pound title.

 Si Pagara, 22-anyos, unang misakmit sa bakus pinaagi sa first round knockout batok ni Miguel Antoine sa Barbados niadtong Oktubre 20 sa miaging tuig didto sa SM Mall of Asia Arena sa Pasay City.

 "Naghinam-hinam na ko sa umaabot nga away. Mag-ensayo ug pangandaman ko ni og maayo dili lang nga

modepensa sa akong titulo, kun dili pagpanimalos sa kapildihan ni Boom Boom," matud pa ni Pagara, diin buot niyang ipasabot ang iyang higala nga si Rey 'Boom Boom' Bautista, kinsa napilde pinaagi sa "split decision" ngadto ni Jose 'El Negro' Ramirez, a stablemate ni Herrera, niadtong Sabado sa gabii didto sa University of SouthEastern Philippines (USEP) gymnasium sa Davao City.

 Sa supporting main event,  si undefeated WBO Asia Pacific super bantamweight champion Genesis 'Azukal' Servania (19-0, 7KOs) mosugal sa iyang limpyong baraha batok ni Isaac Junior sa Indonesia (20-3-2, 8KOs).

 Sa laing away sa triple-header, si Jimrex 'The Executioner' Jaca (37-6-3, 21KOs) nagtinguha sab nga moinat sa iyang winning streak ngadto sa siyam diin iyang isugal ang iyang WBO Oriental light welterweight crown batok ni Jose

Emilio Perea sa Mexico (22-2, 14KOs). (BANAT PALARO)