CEBU, Philippines - Mikulit og 95-84 nga kadaugan ang Ivanhoe-Blue batok sa Delta-Violet ni Roland "El Presidente" Sameon samtang midaug sab ang Bravo-Pink batok sa Alpha-Black, 87-81 kaniadtong Biyernes atol sa pagbukas sa seniors division sa CEKALCO-2013 Mayor Mike Rama Cup inter-color basketball tournament didto sa A. Lopez open court sa barangay Labangon, ning dakbayan.
Mihimo'g 30-16 scoring run ang Ivanhoe-Blue aron inaton ang ilang 21-14 nga abante sa sayong bahin sa second period ug dali kaayong naglabaw og 20 puntos, 50-30 atol sa halftime pinaagi sa pagtimon nilang Moises Crazo ug Ranseh Mulchandani.
Pabiling naglabaw ang Ivanhoe-Blue didto sa second half aron mulampos pagkulit og 11 puntos nga kadaugan.
Silang Craso ug Mulchandani maoy nangu sa Ivanhoe-Blue sa parehong 22 puntos ug giabagan sila nilang Raffy Panerio ug Bert Besties kinsa nagkumboya og 26 puntos.
Sa laing bahin, ang Delta gipangulohan nilang Juniel Villarosa ug Julius Gutierrez kinsa mibahug og 23 ug 22 puntos matag usa samtang miamot si Gany Sinag og 16 puntos.
Sa laing duwa, gipangulohan nilang Kenneth Borromeo ug Dondon Yap ang Bravo-Pink human ilang ma-outscore ang ilang kaatbang didto sa fourth period, 36-20 aron maka-ipsot og sayis puntos nga kadaugan.
Mihimo'g 17 puntos si Philip Nacar ug midugang si Ver Maspiñas ug 15 puntos alang sa Bravo-Pink.
Laing mga teammates sa Bravo-Pink nga mihimo'g double figures mao silang Edward Barellano sa iyang 14 puntos, Bryan Codilla ug Dondon Tenchavez 12 puntos ug Derik Delos Reyes 10 puntos.
Ang napildeng Alpha-Black gipangulohan nilang Borromeo ug Yap kinsa parehong miposa og 20 puntos matag usa.
Puntos matag usa:
First Game:
IVANHOE (95)- Craso 22, Mulchandani 22, Panerio 16, Besties 10, F. Desoyo 7, Benoya 6, Villaber 6, Romariz 4, Ja. Desoyo 2.
DELTA (84)- Villarosa 23, Gutierrez 22, Sinag 16, Estrada 6, Acosta 5, Gonzaga 5, Castro 3, Dumduma 2, Cabalda 2.
Second Game:
BRAVO (87)- Nacar 17, Maspiñas 15, Barellano 14, Codilla 12, Tenchavez 12, Delos Reyes 10, Perino 4, Elmido 3.
ALPHA (81)- Borromeo 20, Yap 20, Templa 13, Arnibal 12, Navares 6, Salaber 4, D. Desoyo 4, Alesna 2. (BANAT PALARO)