CEBU, Philippines - Nagkinahanglan pa'g overtime ang team Hotel sa wala pa sila hingpit makasud sa finals sa Center Katipunan A. Lopez Christian Organization (CEKALCO) 2013 basketball tournament.
Ang Hotel nga gipangulohan sa ilang team captain Kelvin Cinco mibuntog sa Delta team ni Roland 'El Presidente' Sameon sa iskor nga 115-105 niadtong Sabado sa pagtapos sa semifinal round didto sa A. Lopez open court sa barangay Labangon, ning dakbayan.
Human molabaw og kuwatro puntos sa halftime, 43-39, kontrolado na sa Hotel ang duwa sa mosunod nga duha ka kuwarter, apan ang Delta kalit nga misikit ug nakatabla , 87-all nga maoy naghatod sa duwa ngadto sa overtime.
Sa dugang singko minutos, ang Hotel wala na mokompiyansa ug ilang na-outscore ang Delta, 28-18 aron maangkon ang luna sa finals.
Mirehistro og CEKALCO record si Cinco human siya mikadlit og 67 puntos aron pangulohan ang Hotel. Mihimo sab siya’g walo ka assists ug milangkat og 10 ka rebounds.
Gipangulohan sab ni Juniel Villarosa ang Delta pinaagi sa iyang 41 puntos, samtang si Julius nga adunay 21 puntos.
Sa sayo pa, ang team Charlie midaog batok sa Echo sa ilang knockout showdown sa iskor nga 87-75. Ilang banggaon ang Golf team alang sa semifinals diin ang modaog maoy makaangkon sa katungod nga makigsangka sa nagpaabot nga Hotel sa finals.
Ang trio nilang Estoy Panerio, Richard Gubaton ug Coronel Baculio maoy tinubdan sa kadaghanang puntos gikan sa Charlie.
Si Panerio mihakot og 32 puntos, samtang silang Gubaton ug Baculio nagkumboya'g 29 puntos .
Ang Echo gipangulohan ni
Donald Catong pinaagi sa iyang 19 puntos, gisundan ni Janus Desoyo nga adunay 12 puntos.
PUNTOS MATAG USA
Unang duwa:
CHARLIE (87) - Panerio 32, Gubaton 16, Baculio 13, Besties 8, Bacho 6, Do. Panugaling 5, Ensong 4, Dolera 3.
ECHO (75) - Catong 19, J. Desoyo 12, Ji. Villarosa 10, Solana 9, Aspera 9, Dacuyan 6, Dianon 4, Yamoay 4, Romariz 2
Ikaduhang duwa:
HOTEL (115) - Cinco 67, Navares 11, Dosal 10, Tautho 8, Binoya 8, Saceda 5, Valderama 4, Elmido 2
DELTA (105) - Ju. Villarosa 41, Gutierez 21, Damulo 12, Catigtig 7, Estrada 6, Gonzaga 4, Acosta 4, Genon 4, Ho 2, Dumduma 2, Sinag 2