Heat, 27 na

CEBU, Philippines - Lain na sab nga total performance ang gihimo ni LeBron James dihang iyang gipangulohan ang Miami Heat ngadto sa 108-94 nga kadaugan batok sa Orlando Magic  sa duwa nila sa National Basketball Association kagahapon didto sa Amway Center sa Orlando, Florida.

 Diriyot mihimo'g triple-double si James dihang miiskor kini og 24 puntos, 11 ka assists ug siyam ka reboundsalang sa Heat, kinsa miinat sa ilang winning streak ngadto sa 27  bisan og wala makaduwa si Dwyane Wade.

 "We are not taking this team for granted. I continue to always say that in professional sports, wins are hard tocome by and teams like this are really rare. To be part of a team like this, we do not take it for granted,"  matud pa ni James.

 Wala na patiwasa og duwa si James sa nanghinapos nga bahin sa fourth quarter dihang nakontrolar na sa Heat ang duwa human magtabla  sa uwahing bahin sa third period hinungdan nga wala niya makuha ang lain niyang career triple-double.

 Si Mario Chalmers midugang og 17 puntos, sila si Chris Bosh ug Ray Allen miabuno og 12 puntos matag usa alang sa Heat.

 Unom na lang ka daog ang kinahanglan sa Heat  aron ilang matupngan ang rekord  sa   Los Angeles Lakers  niadtong 1971-1972 alang sa labing taas nga winning streak sa kasaysayan nga adunay 33 ka daog.

 "We did enough late in the third quarter and in the fourth quarter to come away with this win. That was some of our best in that fourth quarter on both ends of the court...  Before that, it was a little bit of a sleepwalk," matud pa ni Heat coach Erik Spoelstra  Si Jameer Nelson maoy topscorer sa  Magic pinaagi  sa iyang 27 puntos uban sa 12 ka assists,  samtang si Tobias Harris miamot og 20 puntos.

 Ang four-game road trip sa Miami magpadayon karon didto sa United Center sa Chicago, Illinois.

 Sa Biyernes, ang Heat manulong sa New Orleans Hornets didto sa  New Orleans Arena sa Louisiana diin didto mabugto ang 15 ka sagunsong  daog sa Denver Nuggets.

 Ang road trip sa Heat matapos sa Easter Sunday didto sa San Antonio.

 Didto sa New Orleans, daw dili makatuo si Brian Roberts sa matang sa iyang duwa dihang iyang gitabangan ang Hornets aron maputol ang 15 ka winning streak sa Denver Nuggets pinaagi sa pag-iskor og 110-86 nga kadaugan.

 Si Roberts miposa og 13 puntos ug may 18 ka assists, samtang si Ryan Anderson maoy nangu sa Hornets sa iyang 23 puntos.

 Ang Nuggets nga segurado na sa playoffs, gipangulohan ni Danilo Gallinari, kinsa miburak og 24 puntos.