CVIRAA kampiyon sa under-19

CEBU, Philippines - Laing torneyo, lain  usab nga higayon nga  gisalbar ni Arc Gabrielle 'Argee' Araw-araw ang Sacred Heart School-Ateneo de Cebu (SHS-AdC), kinsa  maoy nagdala  sa bandera sa Central Visayas Regional Athletic Association (CVIRAA) high school team.

 Ang  CVIRAA mipukan sa University of the Visayas (UV) sa iskor nga 85-79 aron maghari sa Under-19 division sa ThreeSixty Pharmacy Cup 2013 CYBL Season 6 didto sa City Sports Club Cebu (CSCC) gym sa Cebu Business Park.

 Human sa 20-18 nga bentaha, gikontrolar sa CVIRAA ang duwa sa second quarter dihang ilang nainat ang labaw ngadto sa 43-29  sa halftime.

 Hinuon, misumbalik ang UV sa second half aron mosikit human sa basket ni Ralph Dinolan ug diriyot pa madisgrasya ang CVIRAA.

 Naglabaw ang  CVIRAA, 70-62,  apan  misikit ang UV, 76-77 human sa three-point play ni Jan Soliva sa nahabiling 2:04   sa duwa. Mihulga pag-ilog sa labaw ang UV, apan tubagon dayon kini ni Araw-araw hinungdan nga wala gyud molampos ang naulahi.

 Halos tanang clutch baskets sa UV  tubagon   dayon ni Araw-araw ug dili kini bag-o alang kaniya nga ilabi na kay iya na kining nahimo atol sa CESAFI juniors finals batok sa UV dihang siya maoy kanunay magasalbar sa SHS-AdC.

 Gawas pa sa CESAFI, si Araw-araw sab ang usa sa nagsalbar sa SHS-AdC atol sa Seaoil Elite League Finals batok gihapon sa UV.

 Si Araw-araw maoy nangu sa CVIRAA  sa iyang 21 puntos, samtang  si Rendell Senining midugang og 19 puntos. Si Dawn Ochea miamot og 14 puntos, si Lucky Ecarma mitampo og 12 puntos ug si   Fletcher Galvez  miariyaog10 points.

 Ang UV gipangulohan ni Dinolan pinaagi sa iyang 25 puntos, gisundan ni Napao nga adunay 19 puntos ug  Ernesto Limitares sa iyang 15 puntos.

 Mao kadto labing unang korona sa SHS-Ateneo de Cebu sa CYBL sa mas taas nga age division.

 Sa laing bahin, ang UV mipukan sa ACES, 66-56 aron mopahiluna sa ikatulong dapit sa Under-16 division.