CEBU, Philippines - Ang University of the Visayas (UV) Green Lancers gikatakdang molarga ngadto sa Kazan, Russia alang sa 2013 Summer Universiade nga pagahimuon matag duha ka tuig.
Ang UV Green Lancers nga maoy morepresentar sa Pilipinas molarga sa Hulyo 6.
Naangkon sa Lancers ang maong luna human sila mikampiyon sa National Students Basketball Championships didto sa Bukidnon niadtong Marso 10.
Lakip ang Lancers sa 83-man delegation ngadto sa Kazan nga ipadala sa Federation of School Sports Association of the Philippines (FESSAP).
Niadtong 2011, misalmot sab ang Pilipinas sa Universiade, ang torneyo sa mga college students sa tibuok kalibotan.
Ang retired colonel nga si Ariel Querubin nga maoy bise presidente sa Philippine Federation of Body Builders Inc. maoy flag-bearer sa Philippine delegation.
Gawas sa Pilipinas, ang mga nasud nga mosalmot sa ika-27 nga Kazan Universiade mao ang Estados Unidos, People’s Republic of China, Japan, South Korea ug host Russia.
Matud pa ni Felix Tiukinhoy, ang CESAFI commissioner ug FESSAP secretary-general for Visayas, nga iya nang gipahibalo niini si UV President Eduardo 'Eddiegul' Gullas kalabot sa pagsalmot sa team nga gastoan sa maong unibersidad.
Gawas sa basketball nga representahan sa UV, ang Pilipinas mosalmot sa 11 ka sporting events sama sa athletics, badminton, beach volleyball, chess, fencing, judo, swimming, table tennis, weightlifing ug lawn tennis.