Threesixty semis gitakda na

CEBU, Philippines - Duha ka teams gikan sa University of the Visayas (UV), ACES ug sa CVIRAA High School team maoy magbagat sa crossover semifinals sa Under 19 division sa nagpadayong  ThreeSixty Pharmacy Cup 2013: CYBL Season 6 didto sa Sacred Heart School-Ateneo de Cebu Mango Avenue Campus Gym.

Sa bag-o lang natapos nga classification phase, gipangulohan sa duha ka teams sa UV ang duha ka group divisions. Midaug sila batok sa Adgers Sportswear, 86-48  aron pangulohan ang Group A ug ang ilang Under 16 age group team naka-ipsot batok sa ACES, 56-52 aron sakmiton ang liderato sa Group B diin ilang  gipalagpot ang ACES ngadto sa  ikaduhang pwesto sa semifinals.

Ang CVIRAA  high  school   team maoy naka-angkon sa ikaduhang pwesto sa Group A human ilang  gipukan ang USPF, 69-36.

Parehong gitapos sa UV ug sa  CVIRAA  ang classification phase sa 3-1 nga baraha  apan tungod sa tiebreaker rule, ang UV maoy nakaangkon sa unang pwesto.

Ang semifinals ug ang finals parehong himoon nga knockout matches.

Ang ThreeSixty Pharmacy Cup 2013 maoy flagship tournament sa Season 6  sa Cebu Youth Basketball League (CYBL). Ang maong torneyo  gisalmotan og  50 ka teams nga gibahin ngadto sa upat ka age groups: Under 10, 13, 16 ug 19.