GRT nakaipsot sa Titans Dribblers

CEBU, Philippines - Nakaipsot ang GRT team ni skipper Gene Tabar batok sa   Titans Dribblers, 77-75 alang sa ilang ikalimang sagunson nga daog aron pahugtan ang liderato sa nagpadayong elimination round sa Buhisan Basketball Association (BBA) 2013 Mayor Mike Rama Cup basketball tournament didto sa Buhisan Sports Complex, ning dakbayan.

Ang GRT nabiyaan og 10 puntos sa halftime, 30-40, apan kalit kining mipabuhagay og 22-16 run pagsugod sa third period  sa tandem nilang  Richard Lopez ug Alex Ardiente aron mosikit sa iskor, 52-56 paingon sa final period.

Sikit ang duwa sa kinatibuk-ang fourth quarter diin  nagtabla kini sa makadaghang higayon ug nagpuli-puli'g labaw hangtod nga nabawi sa GRT ang momentum. Ang three-pointer ni Tabar sa nahabiling 1:50 minutos maoy naghatag kanila’g singko puntos nga abante sa iskor nga 68-63.

Mihulga sa katapusang higayon ang Titans, 70-71 sa nahabiling 48 segundos sa duwa dihang namuntos og maayo  silang Ramir Taboada ug Ekis Villacorte.

Ang baskets nilang Ardiente ug Boy Ramirez sa katapusang  12 segundos maoy naghatag og kaseguroan sa kadaugan sa GRT.

Si Lopez  maoy nangu sa GRT sa iyang 19 puntos, gisundan ni Ardiente nga adunay 17 puntos. Ang Titans gipangulohan sab ni Taboada pinaagi sa iyang 16 puntos.

PUNTOS MATAG USA

GRT (77) - Lopez 19, Ardiente 17, Dela Cerna 14, Tabar 12, Ramirez 12, Acojedo 2

TITANS (75) - Taboada 16, Villacorte 13, Artiaga 13, Castro 11, Lavandero 8, Caballero 8, Cañada 4,

Bagalanon 2