UV mipakgang sa CVIRAA sa ThreeSixty Cup
CEBU, Philippines - Gipukan sa University of the Visayas (UV) ang CVIRAA high school team, 60-51 sa Under 19 division sa ThreeSixty Pharmacy Cup 2013: CYBL Season 6 didto sa Sacred Heart School-Ateneo de Cebu Mango Avenue Campus Gym sa miaging adlaw.
Tungod sa maong kadaugan, miabante sa semifinals sa Group A ang UV.
Nagpungasi nga three-pointers maoy gihimong hinagiban sa UV didto sa fourth period aron sumpoon ang CVIRAA nga gilangkuban sa mga players sa SHS-Ateneo.
Biya ang UV sa halftime, 27-30 apan ilang gisugdan ang third period og 12-0 run aron moposte'g 43-36 nga abante pagsugod sa fourth period.
Silang Ralph Dinolan, JC Escalona, Prince Canete ug Ernesto Limitares maoy nagbanos-banos og pasulod og tres hinungdan nga dali kaayong nainat ang ilang labaw ngadto sa 58-44 sa nahibiling 1:46 ang oras sa duwa.
Si Dinolan maoy nangu sa UV sa iyang 24 puntos samtang ang CVIRAA gipangulohan ni Rendell Senining kinsa miposa og 26 puntos.
Nagtabla na karon ang UV ug ang CVIRAA ug USPF alang sa liderato sa Group A sa 2-1 nga baraha ug gisundan sila sa USJR nga adunay 1-2 nga baraha ug ang Adgers 0-2.
Ang UV makigsangka batok sa Adgers, ang CVIRAA batok sa USPF ug ang USJR makigsangka sab batok sa Adgers.
SA Group B, miabante na sa semifinals ang ACES ug ang UV-U16.
Midaug sab ang SHS-Ateneo 2 sa ilang sangka sa elimination round batok sa Lucky 40 sa iskor, 37-31.
Puntos matag usa:
First Game:
UV (60) – Dinolan 24, Canete 9, Limitares 8, Napao 7, Santillan 7, Escalona 3, Calumpang 2.
CVIRAA (51) – Senining 26, Laguoy 10, Araw-araw 8, Igna 4, Galvez 2, Jaboneta 2.
Second Game:
SHS-Ateneo 2 (37) – N. Araw-araw 11, Navarro 8, Ong 5, Cabarrubias 4, Lim 3, Alcover 3, Clam 2.
Lucky 40 (31) – Dublin 13, Lu 11, Gonzales 2, Arenajo 4, Tomakin 2.
- Latest
