L.A. Clippers lubong

CEBU, Philippines - Makabungog ug makalipong nga 38-18 scoring run ang gigamit sa Sacramento Kings sa fourth quarter aron bihagon ang mas paboritong Los Angeles Clippers pinaagi sa paglubong niini sa iskor, 38-18 ug mikulit og 116-101 nga kadaogan kagahapon sa nagpadayong duwa sa NBA nga gisaksihan og 13,563 ka fans  didto sa Sleep Train Arena sa Sacramento, California.

Ang  Clippers naa karon sa three-way battle alang sa Western Conference playoff seedings uban sa Memphis Grizzlies ug sa Denver Nuggets. Ang Grizzlies adunay 45-21 nga baraha apan tungod sa kadaugan sa Nuggets batok sa Oklahoma City sa iskor , 111-104,  milambo ang ilang baraha ngadto sa 47-22.

Ang  Clippers midailos ngadto sa 46-22 ug nahimutang sa ikalimang pwesto sa Western Conference apan lagmit nga maoy mahimong ikaduhang team sa West tungod kay sila man maoy dako'g tsansa nga mahimong leader sa Pacific Division.

Ang  Kings kinsa naghupot og 24-44 nga baraha, gipangulohan nilang Marcus Thornton ug Toney Douglas sa ilang 25 ug 19 puntos matag usa.  Mibahug si Douglas og 17 puntos sa fourth quarter.

Ang  Clippers kinsa nakakuha lang og  38 puntos gikan sa ilang bench nga gipangulohan ni  Jamal Crawford, na-outscored sa bench  sa Kings, 62-38.

Migamit ang Kings og 13-3 run sa pagsugod sa fourth period aron moposte'g 91-86 nga abante apan daling mibawos ang Clippers dihang nagkasayop-sayop ang Kings aron tablahon ang duwa sa iskor, 96-all.

Wala madugay, migamit og taktika ang coach sa Kings nga si Keith Smart sa pagsige og foul ngadto ni DeAndre Jordan.

Sa laing duwa, midaug ang Indiana batok Orlando, 95-73 ug midaug sab ang Milwaukee batok Portland, 102-95.