CEBU, Philippines - Nangayo pa og overtime ang Golf team ni skipper Kit Arellano una nila maangkon ang 89-86 nga kadaugan
batok sa Echo sa elimination round sa Center Katipunan A. Lopez Christian Organization (CEKALCO) 2013 basketball
tournament niadtong Biyernes didto sa A. Lopez open court sa barangay Labangon, ning siyudad.
Ang kadaugan sa Golf nakamugna og triple-tie alang sa unang puwesto uban sa Hotel ug Delta nga pulos
nagtangag og 8-4 nga baraha.
Sayong nanginit si Donald Catong, kinsa miiskor dayon kini'g 13 puntos sa first period aron hatagan ang Echo
og 26-19 nga bentaha sa wala pa moposte og 10 puntos nga labaw sa halftime, 47-37.
Apan mi-rally ang Golf sa third period sa giya nilang Edward Barellano ug Gino Almencion aron mosikit, 59-65
paingon sa final period.
Nagsinukliay og mga puntos ang duha ka kampo hangtod nga nakatabla ang Golf, 78-all sa nahabiling 15
segundos nga maoy naghatod sa duwa ngadto sa overtime.
Sa overtime period, na-outscore sa Golf ang Echo, 11-8 pinaagi sa crucial baskets ni Arellano, kinsa mao usab
ang nangu sa iyang team pinaagi sa iyang 25 puntos. Sila si Barellano ug Almencion nagkumboya og 35 puntos.
Si Catong maoy nangu sa Echo sa iyang 22 puntos.
Sa laing duwa, naundang ang duwa tali sa team Hotel ug Alpha tungod sa pagbunok sa uwan. (BANAT NEWS)
PUNTOS MATAG USA
GOLF (89) - Arellano 25, Barellano 18, Almencion 17, Hortezano 8, Amahan 8, I. Delos Reyes 6, Garcia 5,
K. Delos Reyes 2
ECHO (86) - Catong 22, Ducayon 15, Solana 12, Macalisang 9, Romariz 9, Villarosa 6, J. Desoyo 4, Dianon
4, Aspera 3, Lanticse 2