CEBU, Philippines - Midaug ang manghud sa elimination apan midaug ang maguwang sa finals.
Mao kini ang hulagway dihang nagbagat ang teams sa Medalle brothers---Noel sa no. 5 seed Simple Likes Barbecue Haus ug Baeng sa no. 1 team MBD Law Firm kaniadtong Biyernes, Marso 1 atol sa pagpahigayon sa F. Llamas Youth Association (FYA) three-point shootout doubles sa ilang 6th season All-Star Challenge didto sa barangay Tisa gym, ning dakbayan.
Si Baeng giparesan ni Junrey "James Yap" Arreglo samtang si Noel giparesan ni Dexter Caballero.
Sa elimination, nakatigum og 20 puntos ang Medalle-Arreglo tandem ug gisundan kini nilang Noel ug Caballero kinsa mi-iskor og 17 puntos.
Ang Janus Abellana-Andrew Pacubas tandem sa no.3 seed Pastrano's Special Chicharon maoy mi-abante sa top three human sila makatigum og 16 puntos.
Sa finals, midaug ang Caballero-Medalle tandem sa iskor 25 puntos batok sa 19 puntos nilang Baeng ug Arreglo.
Ang Abellana-Pacubas tandem mihimo'g 14 puntos sa finals.
Sa laing bahin, si Ejohn Fernandez sa GCM maoy kampiyon sa buzzer-beating samtang sila si Noel Medalle ug Raul Cueme maoy kampyon sa two-ball competition sa iskor, 24 puntos ug ilang gipukan ang Abellana-Mayol tandem kinsa mi-iskor lang og 16 puntos.
Si Abellana maoy kampyon sa slam dunk sa iyang hapsay nga 30 puntos gikan sa tulo ka hurado.