CEBU, Philippines - Parehong midaug ang Sacred Heart School-Ateneo de Cebu (SHS-AdC) ug ang University of the Visayas batok sa ilang mga kaatbang aron maangkon ang luna sa finals sa Under 13 division sa ThreeSixty Pharmacy Cup 2013: CYBL Season 6 sa miaging adlaw didto sa SHS-AdC Mango Campus Gym.
Sa Under 16 division, mi-abante sab sa finals ang Cebu Eastern College.
Naka-ipsot ang topseed SHS-AdC batok sa University of San Carlos sa iskor, 38-35 samtang midaug sab ang UV batok sa CEC, 45-27.
Sa Under 16 division, mi-abante sa finals ang second seed CEC human ilang gipukan ang SHS-Adc 1 sa iskor, 54-43 aron maoy makigtakos batok sa UV.
Sa laing bahin, ang USJR maoy nakaangkon sa ikatulong pwesto sa Under 10 age group human ilang gipukan ang USC South, 22-21.
Sa Division B games, maoy magtakos sa finals ang Southwestern University batok sa USC South-B sa Under 13 division. Ang SWU midaug batok sa Forum, 51-18 ug ang USC South-B naka-eskapo batok sa CEC-B, 37-31 atol sa crossover semifinals.
Sa Under 16 Division B, magbagat pag-usab ang UV-B batok sa Don Bosco-B alang sa ilang finals rematch. Gipalagpot sa UV-B ang USC South-B, 47-35 samtang gilatos sa Don Bosco-B ang CVIRAA Grade School team, 68-53.
Sa bugtong duwa sa bag-o lang gisugdan nga Under 19 age group, gipakuratan sa USPF ang defending champions Adgers Sportswear.