CEBU, Philippines - Walay puangod nga gilubong sa Philippine Health Insurauce Corp. (PhilHealth) ang Flying V Petroleum Oil & Gas, 129-61, samtang gilubong sab sa Hyundai Cebu Inc. ang Blue Blade Technologies Services Corp., 84-70 sa HoopStars 2013 Corporate League niadtong Domingo didto sa J Centre Mall rooftop basketball court didto sa A.S. Fortuna St., Mandaue City.
Gipilde sab sa Innodata Knowledge Services Inc. ang AMA Computer College, 98-81 niining torneyo nga gipaluyohan sa Siknoy Noodle House ug 89.9 Smooth FM.
Si Albert Anadon maoy nangulo sa PhilHealth pinaagi sa pagpabuto og 33 puntos. Nakakuha sab siya og dakung suporta nilang Stephen Yap ug Jun Ramas nga miabag og 22 ug 17 puntos matag usa.
Ang Flying V gipangulohan nilang Lester Caparoso ug Leo Ibao nga nagkumboya og 42 puntos.
Sa laing bahin, sila si Adelfo Delgado ug Junriel Magdadaro maoy nagmaneobra sa kadaugan sa Hyundai Cars.
Si Delgado mikambiya og 15 puntos, samtang si Magdadaro mikimada og 14 puntos.
Ang nahabol nga Blue Blade gipangulohan ni Felipe Sarmiento nga mikagis og 22 puntos. (BANAT SPORTS)