CEBU, Philippines - Gisirohan sa Leylam-sponsored Little Azkals ang Don Bosco Technology Center, 3-0 aron mapanalipdan ang ilang titulo sa boys 14 division sa 10th Thirsty Football Festival kagahapon didto sa Cebu City Sports Center (CCSC).
Ang boys 14 division maoy kinadaghanang entrante nga misalmot ning tulo ka adlaw nga kompetisyon nga adunay 36 ka teams.
Ang garbo sa Sugbu nga si Laurence 'Soy-soy' Colina ug Major Dean Ebarle mitikdol og usa ka goal, samtang ang taga-Manila nga si Marc Winhoffar misikad sa ikatulong goal alang sa Little Azkals sa Sugbuanong coach Oliver Colina.
Sa pikas bahin, ang koponan gikan sa San Carlos City maoy misakmit sa korona sa girls' 14 division batok sa lain usab nga bisitang koponan sa Ateneo de Davao.
Sa laing duwa sa final, ang Abellana National School-Pomeroy mipukan sa Silliman University, 1-0 aron dominahon ang boys' 19 class.
Si Tom Booth maoy mihatag sa bugtong goal alang sa kadaugan sa ANS.
Ang Hiroshi mipilde sa defending men's 42-division champion ERCO, 2-1 pinaagi sa shootout. (BANAT NEWS)