CEBU, Philippines - Ang mga boksidor sa ALA Boxing Gym nga moaway sa Pinoy Pride XVIII mopahigayon na sab og laing public sparring session karong gabii didto sa ALA Boxing and Fitness Gym sa Paseo de San Ramon sa barangay Banawa, ning siyudad.
Pangulohan kini ni two-division world champion Donnie 'Ahas' Nietes nga modepensa sa iyang WBO light flyweight title batok ni Mexican champion Moises Fuentes sa Marso 2 didto sa Waterfront Cebu City Hotel and Casino.
Uban ni Nietes nga mohimo'g sparring mao sila si WBO Asia-Pacific super bantamweight champion Genesis 'Azukal' Servania ug kanhi OPBF champion Jimrex 'Executioner' Jaca.
Sila si Servania ug Jaca moaway sa co-main event uban ni Nietes sa Pinoy Pride XVIII.
Ang undefeated nga si Servania makigsangka sa Indonesian veteran nga si Angky Angkota, samtang si Jaca makigbatok ni Thai Rachamongkol Sor Pleonchit. (BANAT SPORTS)