CEBU, Philippines - Magtiwas ang Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers sa "rubbermatch" sa ilang "best-of-three" finals sa Seaoil National Basketball Training Center (NBTC) Elite League karong adlawa didto sa USC-main gym.
Ang duwa gitakda sa alas-5 sa hapon.
Human mapilde sa opener, 50-67, ang Lancers nakakita og epektibong formula aron hatagan ang Magis Eagles sa ilang unang pilde, 75-61 sa Game-2 aron tablahon ang series, 1-1.
Mao kini ang ikawalong higayon nga magbagat ang Magis Eagles ug Baby Lancers karong tuiga sa usa ka dakung torneyo, lakip na ang CESAFI sa miaging tuig diin SHS-Ateneo miharos sa UV sa ilang "best-of-five" title showdown.
Sa gihapon, si Andres Paul Desiderio maoy lig-ong hinagiban sa Baby Lancers, samtang ang Magis Eagles magsalig ni CESAFI MVP Henric Dawn Ochea uban nilang Arc Gabriel Araw-araw, Jair Igna ug Rendell Senining. (BANAT SPORTS)