CEBU, Philippines - Pulos mikulit og daog ang University of San Carlos (USC), University of the Visayas (UV) ug ang Sacred Heart School-Ateneo de Cebu (SHS-AdC) aron magsawo sa liderato sa Under 13 age group sa ThreeSixty Pharmacy (TSP) Cup 2013 didto sa SHS-AdC gym sa Mango Avenue.
Ang duha adunay managsamang 2-0 win-loss records.
Pareho sab midaog ang USC North ug UV sa Under 10 division ug sa Under 16 age groups atol sa pagbalik sa torneyo sa miaging weekend.
Sa Under 13 division, ang TSP Cup 2012 runner-up UV mibuntog sa Don Bosco-A sa iskor nga 54-28, samtang ang SHS-AdC-A milubong sa USJR-A, 47-27. Gimasaker sab sa USC ang SHS-AdC-B sa iskor nga 70-17.
Sa duwa ubos sa Under 10 age group, ang 2012 runner-up USC North midaog batok sa defending champion USC South, 24-11 sa ilang rematch human sa 2012 finals.
Hapit serohi sa SHS-AdC ang USJR-B dihang midaog kini sa iskor nga 32-3, samtang ang guest team CEC milubong sa USJR-A, 24-10.
Sa Under 13 Division B, ang guest team Thumbs Up milatos sa USC South-B, 35-21.
Sa mga duwa sa Under 16 Division B, gisubhan og daog ang USC South-B, Don Bosco-B ug ang USPF. Ang USC South-B midaog sa SWU, 52-39, ang Don Bosco-B mipukan sa SHS-AdC-2, 34-31, ang University of Southern Philippines Foundation (USPF) mipilde sa Nissi Academy, 43-32 ug ang UV-B midaug batok sa CVIRAA Grade School team sa iskor, 69-60 alang sa ilang ikaduhang daog.
Ang ThreeSixty Pharmacy Cup 2013 maoy flagship tournament sa Cebu Youth Basketball League’s Season 6 nga gisalmotan og 48 ka teams ug gibahin-bahin ngadto sa upat ka age groups category -- Under 10, 13, 16 ug 19. (BANAT SPORTS)