CEBU, Philippines - Naglaraw karon ang Cebu City Sports Commission (CCSC) nga mohimo og laing rekord sa Guinness World Record (GWR).
Ang CCSC nikulit na og rekord sa GWR sa dancesport ug chess nga adunay labing daghang mga partisipanteng nisalmot.
Karon ang CCSC mosuway pagkulit og rekord sa archery.
Dakung hagit kini alang sa CCSC kay menos kaayo ang archers dinhi sa Sugbu. Bugtong si Rosendo 'Dondon' Sombrio lang ang naapil sa nasudnong koponan.
Naghupot karon sa rekord alang sa world's largest archery tournament mao ang Estados Unidos nga adunay 7,804 participants.
Ang CCSC, uban sa Cebu Archery Club nga gipangulohan ni Dondie Joseph, laraw nga mo-produce og 10,000 ka partisipante.
"So why Guinness right away? Because it is something that is very attractive and encouraging, at the same time, you also get to hit your target of transforming the kids not only as gold medalists but a chance to better their lives. Dondon (Sombrio) here finished college because of scholarship through archery," matud pa ni CCSC chairman Edward Hayco.
Laraw sa CCSC ug CAC nga sa Nobiyembre nila himuon ang ilang pagsuway alang sa GWR.
Sa mao gihapon nga kalamboan, ang management sa South Road Properties (SRP) miuyon na nga mopagamit og luna alang sa archery's training ug competition site. (BANAT NEWS)