CEBU, Philippines - Gisugat og daog si Chris Paul sa iyang pagbalik dihang gipukan sa Los Angeles Clippers ang upset-minded nga Washington Wizards sa iskor, 94-87 kagahapon sa nagpadayong duwa sa NBA didto sa Staples Center sa Los Angeles, California.
Miposa og 22 puntos si Paul ug mihimo'g 11 ka assists samtang midugang si Blake Griffin ug 17 puntos ug 11 ka rebounds.
Ang Clippers gikan pa sa ilang three-game sweep sa ilang road trip batok sa Memphis, Houston ug Minnesota ug mipalambo sa ilang home record ngadto sa 19-4. Ang maong daog maoy ilang sagunson ika-upat ug nahitabo kini human sila mabiktima sa Orlando, 101-104 kaniadtong Enero 12 nga maoy nagputol sa ilang franchise-record nga 13-game home winning streak.
Bisan sa ilang season-low shooting percentage nga 36.6, midaug lang gihapon ang Clippers.Si Paul kinsa maoy NBA player of the month alang sa buwan sa Disyembre, mibalik og duwa human siya mapiang hinungdan nga wala siya makaduwa og tulo ka higayon.
Sa laing duwa, gisumpo sa Memphis Grizzlies ang Chicago Bulls sa iskor, 85-82 pinaagi sa overtime, ang unang pilde sa Bulls sulod sa upat ka duwa nga milanat og overtime period.
Mibahug og 19 puntos si Marc Gasol ug midugang si Zach Randolph ug 13 puntos uban sa 19 ka rebounds.
Ang Memphis maoy naka-iskor sa unang sayis puntos sa extra period ug ang basket ni Gasol maoy naghimo niini nga 82-76. Misikit ang Bulls ngadto sa 80-83 human sa lay-up ni Jimmy Butler ug dayon nakahigayon unta sa pagtabla apan misipyat si Nate Robinson sa iyang three-pointer sa nahibiling 25 segundos sa duwa.
Naka-iskor si Robinson ug layup sa may 6.6 segundos apan mibawo sab si Jerryd Bayless sa may 4.8 segundos aron moposte'g 85-82 nga bentaha. Misipyat sab si Carlos Boozer atol sa paghuni sa buzzer.
Mao na kadto'y ikatulong sagunson nga overtime game alang sa Chicago sulod sa upat ka adlaw diin aduna na sila'y record nga 1-3.
Wala makaduwa alang sa Bulls si Luol Deng ug bisan pa niana, ilang naapas ang ilang 17 puntos nga biya sa third-quarter. (GGM gikan sa NBA. com) (FREEMAN)