Pagara batok merlin
CEBU, Philippines - Panalipdan ni Albert 'Prince' Pagara (14-0, 10KOs) ang iyang limpyong rekord sa iyang pakigsangka ni Jilo Merlin (12-14, 2KOs) sa La Trinindad Benguet karong gabii sa main event sa Sinulog boxing sa ALA Promotions didto sa Gaisano Countrymall carpark sa Brgy. Banilad, ning siyudad.
Maisip nga krusyal kini nga away alang sa 18-anyos nga si Pagara ilabi na nga usa kini sa mga gitan-aw nga umaabot nga top boxers sa ALA Boxing Gym.
"Sugod karon, tanang away ni Albert importante," matud pa ni ALA chief trainer Edito Villamor. "Naa siya'y 3 to 4 fights aron ipakita nga andam siya sa mas dagkung away o moaway sa main event sa Pinoy Pride sa umaabot."
Si Albert, manghod ni light welterweight star Jason 'El Niño' Pagara midaog sa katapusan niyang away batok ni Tawanrung Eausampan sa Thailand pinaagi sa second round knockout niadtong Nobiyembre didto sa Maasin.
Sa supporting bout, si Jerson 'Smooth Operator' Mancio (16-3, 7KOs) makigharong ni Gerpaul 'Captain Hook' Valero (13-13, 8KOs) sa Flores Boxing Gym, samtang ang kanhi two-time PABA champion Marvin 'Bato' Tampus (27-16, 18KOs) moaway ni Jimmy Paypa (10-2, 3KOs) sa laing 10-rounder bout.
Mokompleto sa undercard mao ang sangka nila ni Rolando Servania ug Joy Formenter, Ivor Lastrilla batok Takaoki Noma sa Japan, Richard Barrios batok Jayvee Galia, Reymund Tabogon batok Abel Gayhun ug Bryan Lobitania batok Jamjam Ungon. (BANAT NEWS)
- Latest
