Delta nag-una sa Cekalco

CEBU, Philippines - Nasakmit sa Team Delta ni Roland "El Presidente" Sameon ang solong liderato gikan sa kanhi leader nga Team Hotel pinaagi sa pag-iskor og 123-113 nga kadaugan aron maghupot og 5-2 nga baraha sa nagpadayong Center Katipunan A. Lopez Christian Organization (CEKALCO)-2013 second season basketball tournament didto sa A. Lopez open court sa barangay Labangon, ning dakbayan.

Nabiyaan og usa ka palito ang Delta, 26-27 apan gipakusgan nila ang duwa sa second period aron molabaw og tres puntos atol sa halftime, 63-60.

Mihimo'g 31-22 scoring rally ang Delta didto sa third period aron moposte sa ilang labing dakung labaw nga 12 puntos, 94-82 pagsugod sa fourth period pinaagi sa mainitong tandem nilang Julius Gutierrez ug Juniel Villarosa aron moselyado sa 10 puntos nga kadaugan.

Miburak og 41 puntos si Villarosa alang sa Delta ug midugang si Gutierrez og 31 puntos.

Mikulit og record nga 73 puntos atol sa ilang kapildehan si Kelvin Cinco alang sa Hotel ug nakumboya silang Bhords Tautho ug Dennis Villarama og 24 puntos.

Sa sayo pa, gilubong sa Team Echo ang Foxtrot, 91-71 alang sa ilang ikatulong daog samtang nahiagom sa ilang ika-upat nga pilde ang Foxtrot kinsa naghupot na og 2-4 nga baraha.

Kanunay naglabaw ang Echo ug misamot kainit didto sa fourth period nga naglakip sa ilang 28-16 scoring run nga giduslitan nilang Donald Catong ug Jimbo Villarosa aron modaug ug 20 puntos.

 Mihakot og 32 puntos si Catong aron maoy mangu sa Echo samtang si Villarosa midugang ug 15 puntos.

 Ang pilderong Foxtrot gipangulohan nilang Moises Craso ug Jing Sumalinog kinsa miposa og 16 ug 11 puntos, matag usa.

Puntos matag usa:

ECHO (91)- Catong 32, Ji. Villarosa 15, Aspera 12, Dianon 10, Solana 7, Yamo-ay 6, Romariz 5, Desoyo 2, Macalisang 2

FOXTROT (71)- Craso 16, Sumalinog 11, Lazaga 10,  Zafra 9, Navales 9, Elmido 8, Delos Reyes 4, Villamor 4.

Second Game:

DELTA (123)- Ju. Villarosa 41, Gutierrez 31, Acosta 12, Damulo 12, Gonzaga 11, Catigtig 6, Genon 4, Sinag 4, Dumduma 2

HOTEL (113)- Cinco 73, Tautho 14, Valderama 10, Craus 8, Navares 6, Elmido 2