CEBU, Philippines - Tulo ka elite fighters sa Yaw-Yan ArDigma-Cebu ang mopakita sa ilang abilidad sa Universal Reality Combat Championship (URCC)-Cebu fight card karong Enero 19 didto sa J Centre Mall Convention Hall sa A.S.
Fortuna St., Mandaue City.
Ang tulo ka Mixed Martial Arts (MMA) fighters sa Yaw-Yan ubos sa giya ni Yaw-Yaw Cebu ArDigma Founder ug CEO Master Benigno 'Ekin' R. Caniga Jr. mao sila si Roel 'Akiyama' Rosauro, Vaughn 'The Spawn' Donayre
ug Kyle 'Hurricane' Co.
Si Rosauro, kinsa lab-as pa sa iyang second round TKO nga kadaugan batok ni Israel Gomez atol sa Ground and Pound VI niadtong Agosto didto sa Cebu Coliseum, makigharong ni Jemery Quinonero sa Davao.
Damgo niya nga masakmit ang ikaduha niyang daog sa URCC human usab niya gipilde sa miaging URCC-Cebu ang pambato sa Bullet Muay Thai nga si Arnel Ylanan.
Sa iyang bahin, si Donayre nga mirepresentar usab sa Deftac Cebu tinguha mokulit og 4-0 record batok sa veteran grappler nga si Allan Atup sa Butuan Extreme MMA.
Mag-atubang usab si Co og lisud nga hagit batok sa Brazilian Jiu-jitsu specialist nga si Ervin Musico sa Deftac Dumaguete.
Sama ni Rosauro, si Co midaog usab pinaagi sa TKO batok ni Jonamar 'Naruto' Macaraya sa ATC
Kickboxing Club niadtong Agosto sa miaging tuig. (BANAT SPORTS)