Talk N’ Text miduol sa finals
CEBU, Philippines - Nihayag ang dalan sa Talk N’ Text Tropang Texters paingun sa laing PBA finals appearance human nila giyabo ang Alaska Aces, 99-95, sa Game-5 sa ilang ‘best-of-seven’ finals series kagabii didto sa SM Mall-of-Asia Arena.
Sa maong kadaugan, ang Talk N’ Text naglabaw karon sa serye,3-2, ug may kahigayunan sila nga hingpit nga idispatsar ang Alaska sa Game-6 sa Enero 4 didto sa Cuneta Astrodome.
Sama mga miaging duwa sa ilang serye, nahimong sikit ug pisikal ang duwa, apan mipatigbabaw ang experience sa mga batos ni Talk N’ Text coach Norman Black aron mapukan ang mas batan-on nga Alaska.
“I know they (Alaska) are a tough team, that’s why we are working hard in this series, hopefully we can finish the series to advance to the finals,” matud pa ni Talk N ‘ Text coach Norman Black.
Sayung nakontrolar sa Texters ang labaw sa pagpangulo ni Jimmy Alapag ug Kelly Williams aron iposte ang 12 puntos nga labaw, 55-43, sa first half.
Gipakusgan pa sa Talk N’ Text ang ilang opensa human namuntos sila si Harvey Carey ug Ryan Reyes aron inaton ang labaw sa 14 puntos, 75-61, sa 2:02 sa third period.
Miaksiyon og gukod ang Alaska sa katapusang dos minutos human sa sunod-sunod nga triples ni JV Casio ug Dondon Hontiveros, apan nakabsan na sila og oras human usab kanunay nga mitubag og puntos ang Talk N’ Text. (BANAT NEWS)
- Latest
