CEBU, Philippines - Nakakuha na usab og laing kahigayunan aron moaway sa world title ang Cebuano nga si Malcolm ‘Eagle Eye’ Tuñacao human niya gipilde pinaagi sa seventh round technical knockout ang Mexican nga si Christian Esquivel niadtong miaging gabii didto sa Central Gym sa Kobe,Hyogo,Japan.
Ang 35-anyos nga si Tuñacao mao karon ang mandatory challenger alang sa WBC bantamweight championship nga gihuptan sa undefeated Japanese nga si Shinsuke Yamanaka.
Taliwala sa bahad sa Mehikano nga tumbahon siya, mas gipakita ni Tuñacao ang iyang kabangis human niya dabo-dabohi si Esquivel kinsa wala na makaantos ug misurender sa 2:10 sa seventh round.
Sa maong kadaugan si Tuñacao kinsa mao usab ang OPBF champion mipalambo sa iyang rekord ngadto sa 32-2, 20KOs, samtang si Esquivel nahagsa sa rekord nga 25-4. 18KOs.
Si Tuñacao naglaum karon nga subling makuptan ang world title human usab siya nahimong WBC flyweight champion niadtong tuig 2000.
Ang Japanese-based nga si Tuñacao salig usab sa iyang kahigayunan batok ni Yamanaka kinsa midaog usab sa world title niadtong miaging tuig batok gihapon ni Esquivel kinsa iyang gipasurender sa 11th round.
Sa laing bahin, ang kadaugan ni Tuñacao mao usab ang ikatulong daog nga gihimo sa mga Pinoy boxers sud lang sa usa ka semana didto sa Japan. Una nang midaog ang mga OPBF champions nga sila si Rocky Fuentes ug Arthur Villanueva.