CEBU, Philippines - Magtiwas atol sa Pasko ugmang adlawa ang San Mig Coffee Mixers ug Rain or Shine Elasto Painters aron masakmit ang krusyal nga Game-3 sa ilang ‘best-of-seven’ semifinals didto sa SM Mall-of-Asia Arena.
Ang San Mig ug Rain or Shine nga nagtabla sa serye, 1-1, subling magsangka ugma sa alas-5:00 sa hapon.
Maisip nga usa sa mga grabeng panagribal sa kasaysayan sa PBA ang nahitabo tali sa San Mig ug Rain or Shine nga nakita karon sa ilang semis series.
Ang Rain or Shine unang miangkon sa daog, 91-83, apan daling nakabalik ang San Mig human usab nila gidemolis ang Painters sa Game-2, 106-82.
Gawas nga pulos adunay abilidad ang duha ka koponan sa paglusad og bangis nga opensa, atangan usab nga magpadayun ang pisikal nga duwa tali sa mga players niini.
Ang San Mig magsalig gihapon sa ilang franchise player nga si James Yap kinsa maoy bayani sa Game-2 diin mibubo siya og 34 puntos, bisan paman og may gihambin kini nga injury sa tuhod.
Sa ilang bahin, ang mga batos ni Rain or Shine coach Yeng Guiao gusto nga mamawi ilabi na ang ilang mga leading scorers nga sila si Paul Lee ug Jeff Chan kinsa wala kaayo makatabang sa Game-2 diin igo lang silang nagkumboya og 16 puntos.